| Passwort vergessen?
Sie sind nicht angemeldet.  Anmelden
kleine Frage
 1 2 3
29.09.08 12:29
gummibaerli 
kleine Frage

Hallo ihr liebe Brüt

Ich han da mol en chlini frog, villicht isch die au scho mal gstellt worde, aber villicht chönder sie mir glich beantworte.
Ich bin siit es paar monet mit mim Schatz zämä und ich lieb ihn würkli über alles. Ich weiss au, dass es vo ihm us so isch und mir händ au scho über üsi Zuekunft gredet (zämäzieh, hürote, chind). Ich lieb ihn würkli, aber i han eifach es bitz sgfühl, dass alles sehr schnell goht. Ich kenn i mim Bekanntekreis niemer, wo nach so churzer ziit scho über s'hürote gredet hät und das verunsicheret mich. Min Schatz isch au scho fascht 30gi und er wünscht sich ganz fescht gli en eigeti Familie...

Jetzt mini frog: Wie lang sind ihr ca. mit üchem schatz zämägsi, bevor ihr üch über e hochziit und Familie gedanke gmacht händ? Oder afange Plane händ...?

Eigentlich chan ich mir ebe nüt schöners vorstelle, als mit mim Schatz de Rest vo mim Läbe zverbringe, aber glich gohts chli schnell... was meinet ihr?

Danke für en hufe Antworte!

29.09.08 12:54
SchniSchna 

Re: kleine Frage

Hoi Gummibärli

Ech fendes öberhaupt ned komisch, wenn mer inere Beziehig öber d Zuekonft redet. Ech ond mi Frönd send sehr schnell noch em Könnelehre zäme cho ond hend aber scho i de erschte Gspröch die Themene beredet, wo du schriibsch. Mer hend zwar zo dem Ziitponkt ned öber Datum etc. gret, aber so hed jede grad gwösst, was im andere sini Vorstellige send beträffend Zuekonft. Öber s Thema Zuekonft (alles inbegriffe vo Hürote bes Familie etc.) dömmer emmer weder laufend schörrele ond diskutiere, das fend öppis vom Wechtigste inere Beziehig!!!

Mer send denn 3/4 Johr noch dem mer zäme cho send, zäme zoge ond jetzt semmer 3 1/2 Johr zäme ond hend eus vor 4 Mönet entschede, dass mer wend nöchst Johr hürote.

Döf ech froge, wie alt besch du?

Grüessli, SchniSchna


Mer freuid eus rüüdig of de 12. Juni 2009

29.09.08 12:58
madmadi 

Re: kleine Frage

Es git do viel möglichi Asichte... grundsätzlich isch es jo so, dass es wenn's stimmt egal isch, wie lang mer scho zäme isch - au nach vielne Johr cha en Beziehig id Brüch go. Aber natürli isch es au kei Nochteil, wemmer enand scho guet kennt und mer weiss, was de ander so für Macke het - will heisse, wenn d Verliebtheit vom erschte Johr oder so scho bitz verfloge isch und mer de ander au i Alltagssituatione erläbt het (mir sind mit 15 und 16 zämecho und händ jetzt nach 10 Johr Beziehig und 3 Johr Zämeläbe ghürote).

Aber ich find's jetzt ned tragisch, dass ihr scho über Hürote und Chindbecho redet - schliesslech wett mer jo usefinde, öb de ander ähnlechi Ziel het. Es isch natürli öppis anders, wenn ihr scho konkreti Plän schmiedet, aber mol chli de Rahme abstecke, isch doch gar nid schlächt. So wösse der ämu, was s andere so för Erwartige oder Träum het.

Schlussändlich müend natürli beidi bereit si derfür. Hesch dim Schatz scho mol gseit, dass du dich chli überfahre fühlsch? Ich be sicher, er wird Verständnis ha und dir die Zit gä, wo du bruchsch, um dich a dä Gedanke (wo du jo grundsätzlich guet findsch) z gwöhne.

Ich wünsche öich alles Gueti!

Grüessli
madmadi


Sit em 8. August 2008 glücklichi Ehefrau!

29.09.08 13:00
gummibaerli 
Re: kleine Frage

Hallo SchniSchna

Ich wird demnächst 23gi, min Schatz wird nägscht johr 30gi. Für mich isch immer scho klar gsi, dass ich gern au mal früeh hürote und chind han (natürlich nume, wenns de passend mah dezue gig;-)) drum han i mit em alter i demsinn absolut au kei Angscht.

Ich kenns eifach weniger, dass es so rasch goht, bis mer würkli fascht konkret devo redet. Wenns nach mim schatz goht, denn würdet mer bereits zämäwohne (was aber us andere gründ nonig grad so schnell goht) und demnächst hürote... D'Lüt i mim bekanntekreis sind all so 3-4 johr (zum Teil no länger) zämä gsi, bevors überhaupt mal de gedanke gfasst händ zhürote...drum bin i ebe chli verunsicheret...

I finds ebe eigentlich sehr schön, wenn mer eifach vo de gmeinsame Zuekunft chan redä. Schliesslich muen mer ja au wüsse, öb mer öppe uf de gliche wellelängi liit.

29.09.08 13:03
gummibaerli 
Re: kleine Frage

Hallo Madimadi

Ja, mine schatz weiss, das ich nit pressiere wot. Er akzeptiert das au und mir gnüsset eifach d'ziit. Als erste schritt chaufet mer jetzt zämä fründschaftsring, so als zeiche vo de zämäghörigkeit. Das find ich mega schön und ich freu mich unglaublich uf die Ring. Aber ich denk eifach au, das mir zwei nochli ziit bruchet zum üs besser kennezlerne. Und mir sind ja beid no jung, und müend nüt überstürze. I han eifach denkt, es isch villicht mal guet zwüsse, was ander so drüber denket...

29.09.08 13:28
tess 

Re: kleine Frage


also ech ond mi schatz send etzt sett fascht 6 johr zäme ond wohne sett 3 johr zäme. för mech persönlech esches wechtig, dass mer sech werklech kennt. ond das hätt ech etzt nochem 1. johr beziehig secher noni chönne säge. erscht sett dem mer zäme wohne ond haut de alltag zäme müend bestriite ben ech mer ganz ganz secher. ech hätt ehm ou ned chönne zgli säge: ech liebe dech - liebi esch ned gliich wie verliebt si.

aber im ändeffekt muess es jede sälber wösse. nor well ehr jo dröber gredt hend mönder jo ned grad morn hürote. är hett velecht etzt eifach afi welle wösse öb ehr die gliche ziel hend. öbers hürote ond so hemmer ou scho relativ glii gredt, eifach zom wösse öbs gägenüber sgliche wett oder vorstellt wie mer sälber.

29.09.08 13:55
Angie13 

Re: kleine Frage

Hallo Gummibärli und alli andere
Bi mir und mim Maa isches sehr schnell gange, mir sind nacheme halbe Jahre zäme zogge, Wassi nie bereuit han, wills eifach sehr schön isch unds rundum stimmt. und nach 1 Jahr und 3 Mönät nach em kennelerne hämer ghörate, das isch das Jahr am 06. Juni gsi.........

Ich chan nur säge los uf Dis Gfühl und uf Dis herz, und dänn machsch au das wo für die stimmt und richtig isch.

Ich chan nur säge, dass ichs nöd e einzigi sekundä bereut han. Will er isch dä maa mit dem i alt werde möcht......

Ganz liebi Grüess Angie 13

29.09.08 14:37
gummibaerli 
Re: kleine Frage

Hallo ihr liebe!

Merci vill, vill mal für all üchi Antworte. Das isch ja ganz rasant gange. Mir isch es eifach wichtig gsi, mal zghöre, was ander so drüber denket. Aber es isch demfall definitiv vo Mensch zu Mensch verschiede.

@ Tess: Was i nu churz an wellä amerke: Min Schatz hät mir scho zimli rasch gseit gha, das er mich liebt. Und ich bin überhaupt nit uf das gfasst gsi, will ich zwüschet verliebt sie und liebe au nu en unterschied mache. Ich han ihm denn gseit, dass ich nonig sowiit sig, und ich au vo ihm finde, das er mir das würkli erscht chöng säge, wenn ers au zu 100% so meini. Er hät das akzeptiert und es isch denn lang nüme gfalle. Und irgendwenn hät er mir denn wieder gseit, das er mich würklich liebe, au wenn ich nonig sowiit bin und umso glücklicher isch er denn au gsi, wo ich denn au endlich han chönne säge, das ich ihn liebe. Ich weiss jetzt nit, öb das so überechunt wie ich's meine aber du verstohsch es sicher öppe.

@ Angi: Wow bi üch isch das ja würkli au recht rasant gange. Weisch, bi mir isch es ebe so: Ich chönt mir eigentlich sehr guet vorstelle, bald mit ihm zämä zsie. Aber ich wohn ebe am Zürisee und er im Tösstal und ich bin erscht vor knapp eme halbe johr i mini jetzig wohnig zoge, wo mir hammer mässig gfallt, au d'region und alles und zudem isch mini Familie i de nöchi. Aber mini Wohnig wär zchli für üs beid. Und er hät im Tösstal en befristet Mietvertrag bis Endi johr und ich möcht eigentlich au nit is Tösstal zieh, will ich das praktisch gar nit kenne (usser halt ebe vo ihm). Und was au no isch: Er hät die Wohnig wo er no dri isch ebe mal mit sinere Exfründin gmietet gha und churz nachdems izoge sind, isch es usenand gheit. Und mir wär dur das au nit ganz wohl, mit ihm ine wohnig zsie, wo er alles mit de Exfründin usgsuecht und igrichtet het...
Es isch alles chli kompliziert. Aber ich hoffe scho, das mer's mal schaffet;-)))

Merci nomol allne. I lohs jetzt eifach mal uf mich zuecho. Han ihm eh gseit, dass i scho en richtige Hürotsatrag wott, wenns denn mal ernscht wird;-) Und de isch ja nonig cho.

29.09.08 18:51
Angie13 

Re: kleine Frage

Hallo Gummibärli

Ja bi üs isches würklich schnell gange, aber es isch s richtige, ich bin endlich a cho

Min Maa hät im zürcher Unterland gwohnt und ich im Zürcher Oberland........
Dä Wäg isch eifach wiit gsi, vorallem willer im Aargau schafft. So hämer eus entschiedä, in Aargau z zieh

Ja häsch richtig glese ich als Zürcher oberländerin bin in Aargau züglet. Und i has ned einisch bereut, will es isch würklich schön da, so nöch bim Riiih zue.

Liebi Grüess Angie

30.09.08 09:18
gummibaerli 
Re: kleine Frage

Hallo Angie!

Wow, de bisch ja scho grad es stuck wegzüglet. Mis "Problem" isch ebe, das ich sehr a minere Familie hange. Ich han scho mal wiiter weg gwohnt und bin den ebe us dem Grund, will i mini Familie so vermisst han wieder i d'nöchi züglet. Und ich het im Moment eifach chli angscht, das wenn ich zu mim Schatz wür zieh, dass i das glich wieder han...vom Schaffe her isch es für mich ebe eigentlich egal wo ich wohne würd, han vo beidne ort öppe glichwiit. Aber ebe, es isch chli kompliziert im Moment. Mal luege, was sich schlussendlich wird ergäh...

 1 2 3
ordentlichs-exemplar   sälbstverständlech   zusammengewohnt   unverantworlich   Familie   kompromissbereitschaft   gschirrspüeler   Alltagssituatione   schlussendlich   unverantwortlich   Gummibärli   Beziehig   hochziitsvorbereitige   torschlusspanik   fründschaftsring   funktionierendes   unverständlich   hindenochegrumet   Deutsch-Schweizer   missverständnis