| Passwort vergessen?
Sie sind nicht angemeldet.  Anmelden
My proposal
 1 2
13.09.12 20:56
cream_tangerine 

My proposal

So, ich han denkt ich verzell au mal nah vo miim romantische Hüratsatrag wo ich am 14. Juli 2012 han döfe erlebe...

Ich bin nach 5 Wuche "Abstinenz" miin Schaz in Liverpool go bsueche (Ja, Fernbeziehige hend das leider ah sich). Ohni irgend eh Vorahnig het mer mich is Auto fo miine Schwiegereltere-to-be iglade, zum gmeinsam nacheme Spaziergang imene schöne Restaurant go Znacht esse. Dass es dazue nie wird cho, han ich i dem Moment natürli nöd gahnt...

Mier sind also los gfahre und scho bevor mier ahcho sind hend miim Schaz siini Eltere agfange "strite". Ich han mich nöd würkli druf ilah, will ich denkt han, dass die das scho under sich werded löse. Wo s'Auto den aber aghalte het het mier miini Schwiegermuetter mitteilt, dass sie vergesse hend tanke und mier zwei (also, ich und miin Schaz) schomal sölled dä Spaziergang mache und sie ois den chömed go abhole fürs Znacht.
Guet, so öpis chunt bime Schussel wie miim Schwiegervater no öpe die vor, dorum han ich mier da gar kei Gedanke drüber gmacht und müsse schmunzle.

Ich bin denn dur es Feldwegli gfüehrt worde und mier sind zersch anen Ort cho wos eh alti Windmühli gha het und womer en wunderschöne Blick uuf dSkyline fo Liverpool gha het. Eigentlich han ich gmeint, dass segs dänn xii. Ich han miini Föteli gmacht und wär eigentlich gern nah chlii det blibe, aber miin Fründ het xeit, es wartet nah öpis bessers.

Also bin ich ihm wieder zrug gfolget bis mier vor eme andere alte Gebäude gstande sind. Ich muss da dezue sege, dass mier scho zimlich am Afang vo oisere Beziehig mal umetroimt hend und devo gredet hend, dass mier mal zäme imene Lüchtturm wohne werded. Wie ihr oich also chönd vorstelle, isch das Gebäude en Lüchtturm xii. Gnauer xeit Bidston Lighthouse uuf dä Wirral. Han uh froid gha, dass er mich da ane bracht het und han en gfröget, wie er denn das gfunde het. Er het mier denn verzellt, dass siin Unkel d'Bsitzer kennt und im gliche Satz het er mier xeit, dass ich söll d'Auge zuemache.
Völlig perplex han ich das gmacht und han eh Sekunde spöter en alte Schlüssel i dä Hand gha. Ich bin zwar erstunt xii, han aber denkt, dass das eifach so en Jux xii isch, will er ja de Bsitzer kennt.
Ich han den döfe di alt Türe uufmache und bin uh gwundrig xii, wie so en Lüchtturm den fo inne uusxeeht (immer nah komplet ahnixlos!!!). Miin Schatz het mich den dWendeltreppe uufe gfüehrt und ich bin im erste Stock grad mal stah blibe und han di alt Bibliothek beguetachtet. Im Nachhinein isch mier ez klar, wieso dass miin Fründ mich umbedingt so schnell wie möglich fo de Büecher het wele weglocke zum di nögscht Treppe ufezstige.
Er hets den glich gschafft mich fo dä Bibliothek wegzrisse und schlussendlich sind mier im alte "Liechtzimmer" gstande. Mier hend zersch di wunderschön Uussicht gnosse und ich han wieder es paar Föteli gmacht, bis miin Fründ xeit het, ich söll mal uuf en Stuehl sitze.

Er het den es chliises Laternli füregholt und das azündet. Er het gfunde, wenn mer scho imene Lüchtturm sind, müend mer ja au es Liecht ha. Er isch den nebed mich gsesse und het mier xeit, dass er fo dem Lüchtturm ghört het und er mich umbedingt het müsse da ane bringe, zum zeige wie fescht er mich liebt. Ich han denn eh Box mit Chliinigkeite übercho, wo gmeinsami Erinnerigsstuck drin xii sind. Und bevor ich irgendwie han chöne schnalle, was eigentlich passiert het er scho es Ringböxli zückt gha und ich vor mir uufd Chnü.

Als ob ich nöd scho komplett fassigslos xii wär, hät er sich sogar nah die Müeh gmacht und mich uuf dütsch gfröget: "Möchtest du mich heiraten?" (nur zur Info, er het ersch gad agfange dütsch lerne!)

Haha, will ich so en Schussel bin, vorallem wenn ich nervös bin, han ich nur gantwortet: "No! You're crazy!" Han den aber gfröget, eb ich dööf de Ring alegge und han en, völlig unromantisch, ah mich grisse und en azoge.
Ersch den isch mer eigentlich so richtig klar worde, was grad passiert isch und ich bin ihm um de Hals gfalle. Natürli het er den sie's JA den doch nah übercho ;)


Jaaaaah... so ischs xii ich bin immer nah so glücklich drüber, wie fill Müeh er sich gäh hät und han eifach sbedürfnis gha, dass mit oich zteile

13.09.12 22:31
Chibi 
Re: My proposal

Jööö

14.09.12 07:54
memphiswalker 
Re: My proposal

oh mein gott! das isch ja de hammer! hans jetzt gad duregläse und zerscht dänkt, wow super maa wo du da gfunde hesch und am schluss nurno müsse schmunzle ab dinere reaktion uf sin atrag haha ich kenne so sache vo mir sälber au nur zu gut!

14.09.12 07:59
cream_tangerine 

Re: My proposal

memphiswalker:
... und am schluss nurno müsse schmunzle ab dinere reaktion uf sin atrag haha ich kenne so sache vo mir sälber au nur zu gut!


hahaha, ja ich han i dem moment eifach nüme chöne klar denke und den chunt den halt irgendöpis uus em muul use

14.09.12 08:06
Daninici10

nicht registriert

Re: My proposal

sooooo schööön

14.09.12 08:21
memphiswalker 
Re: My proposal

hahah ich chans super nahvollzie, wär mir glaub i dem moment au nid andersch gange! hammer! und du hesch voll nid demit grächnet nach dem ganze windmühli lüchtturm romantik-ding?

14.09.12 09:01
PrinzessinN

nicht registriert

Re: My proposal

Ohhh so en schöne Hürotsatrag...imene Lüchtturm...voll romantisch

14.09.12 09:39
CoRa 

Re: My proposal

WOOOOw! Eifach wunderschön! Ha grad Hüehnerhut becho!

14.09.12 11:42
Sanis

nicht registriert

Re: My proposal

Wau! Soooooo härzig.

14.09.12 17:25
Kate82 
Re: My proposal

jö, wie härzig! Dämfall härzlichi Gratulation zur Verlobig Und jetzt, plaaned ihr s'zämezieh? Gosch uf Änland? Plaanet ihr d'HZ us zwei Länder Egal wie, ich wünsch euch vill Spass und Freud bim Plane und vorbereite!

 1 2
Fernbeziehige   romantik-ding   wunderschöne   unromantisch   dWendeltreppe   Liechtzimmer   Schwiegereltere-to-be   Erinnerigsstuck   Schwiegermuetter   wunderschön   Eigentlich   beguetachtet   schlussendlich   Chliinigkeite   memphiswalker   proposal   Lüchtturm   Gratulation   Schwiegervater   Spaziergang