| Passwort vergessen?
Sie sind nicht angemeldet.  Anmelden
Wie habt ihr euch verlobt? Wer hat wen gefragt?
 1 2 3 4
21.12.07 22:46
SaHa 
Re: Wie habt ihr euch verlobt? Wer hat wen gefragt?

Tja..es wird doch no romantisch!
Vori woni hei cho bin, hend im Gang am Bode Cherzli brönnt und er isch mit Rose dehinter gstande. Denn het er mi gfragt, ob ich sini Frau wett wärde... Ha natürlich ja gseit! Oh wie schön!!!

19.02.08 11:10
Mara

nicht registriert

Re: Wie habt ihr euch verlobt? Wer hat wen gefragt?

Ähm, bi mer ischs chli speziell gsi. Mi Schatz het eigentlech immer gseit er weigi nid hürote und Chind ha und so. Wöus för mi au nid Läbensnotwändig gsi esch beni nid witer druf iigange. Au schüscht isch är eher en verschlossnige Typ was Gfühl und so agoht.

Glich hätti ehn doch gärn weue hürote weu, dass eg för immer wett mit ihm zäme si isch eh klar gsi.

Einisch amene Obe si mer beidi is Bett gläge, eg ha no gläse wo är plötslech meint:" Eg ha geschter en mega schregä Troum gha." Eg ha natürlech nochegfrogt und denn het er gmeint:" Eg ha träumt, dass eg imene riiiese Ruum stoh, mega höchi Dechi und denn ghöri uf einisch Musig und es grosses Toor isch uf gange. När besch du mit dim Vater innecho und du hesch es ganz es wiises Chleid annegha. Was meinsch chönnt me das loh wohr wärde?"

Eg be baff gsi. Zersch hani gmeint s isch en Scherz und när hani panik becho. Isch jetzt würkli das dä Atrag woni so fesch druf ghofft ha? Oder wie oder was? Eg be total usem hüsli gsi und ha gar nid dra dänkt "jo" s säge

Am nöchschte morge het er denn nochegfrogt öbi denn jetzt wot oder nid und eg ha dänkt, so eg cha ehn genauglich schocke wie är me und ha gseit:" Das esch en seehr en wichtigi Entscheidig för me, gib mer no chli Zyt dasi mer das gründlech cha öberlegge, schliesslech wetti nur einisch i mim Läbe hürote."

Är het mi 3 Täg lang jede Tag wider ufs neue gfrogt öb eg ehn wot hürote und z letscht hanis natürlich nümme usghalte, hätt jo vo afang a jo gseit und das het är bestimmt au gwüsst. Eg weiss eg be fies

21.02.08 10:32
cannella 

Re: Wie habt ihr euch verlobt? Wer hat wen gefragt?

Tja, bi üs isches au chli speziell gsii... mier hend rächt schnell gwüsst, dass mier wettid für immer zäme bliibe und hend drum au gli über s hürate afa rede... s Datum de 08.08.08 isch au grad sofort klar gsii und drum hend mier au glii chli afa plane. Aber en Atrag heds lang ned gäh. Mi Schatz hed immer gseid, er heig scho mal einisch eine gmacht gha (isch sini zwoit Ehe) und ich ha gfunde, das sigg em Maa sini Sach! Er hed aber gwüsst, dass ich ihm bis es Jahr vor üsem Hochziit ziit gibe und de undernimm ich öppis... Am 21.07.07 hed mich mis Schätzi de au ganz romantisch mit viel Cherze und üsem Lied im gröschte Schiff uf üsere Terasse gfragt und üse Trauzüge hed nachdem ich luut "Ja" grüeft ha es Füürwärch abglah!

Da aber ja bis am 08.08.07 nüm viel Ziit bliibe isch, han ich au scho afa organisiere und ha drum scho es paar Sache dihei gha für min Atrag, was hätt ich de sellä mit dene Sache mache Genau, ganz eifach, am 08.08.07 quasi au nomal en "Atrag" mache

Uf üsere Homepage [http://www.wirheiraten.ch/kenel-erni/content-r20674.html] chamer die ganz Gschicht süsch nacheläse

Es Grüessli

Cannella

21.02.08 13:17
Pilz 
Re: Wie habt ihr euch verlobt? Wer hat wen gefragt?

Bi eus hät er dä Atrag gmacht. Ich han am Namitag na gwitzlät mit dä Arbätskolegin. Sie hät gseit vielicht chöm ich na dä Feriä verlobt hei. Ich han gfundä vielicht krieg ich än scho hüt nacht. Da mir an Ranfftträff gangä sind. A dä Ort wo mir vohr 4 Jahr eus erst mal küsst händ. Ich han dä gedankä aber schnell wieder vergässä und scho hämer eus uf dä Wäg gmacht richtig Flüäli mit ganz vielnä anderä. Am morgä am 2 Stiegäd dänn als i diä besagti Ranftschlucht abä, kriegäd Ranft Cherzä und det gits än Miternachtsgottäsdienst. Isch ja nüt usergwöndlichs so wiä immer ;-). Und genau a däm Momänt wo mer diä Cherzä azündät händ. Han ich sLicht wellä witer gä und bin ihm dävo gloffä. Wo ich wieder retour chum chüschälät er mir is Ohr öb ich sindi Frau wett werdä. Isch bin so überrast gsi das ich nur no äs jajaja usäbracht han(eigendlich hät er sich das ganz romantisch usdänkt er git mirs licht und frögt mich dänn,nur leider bin ich ihm ja dävo gloffä. Ha mich nachher chli gergerät. Däfü isch wo mer eus erst mal küsst händ so romantisch gsi. Wo mer Augä ufda hän isch diä ganz Schlucht gfüllt gsi mit ämä riesä Lichermeer.Nur für eus ;-)). Und dänn simmer eus eifach i dä armä glägä. Vo allem usäumä han ich nüm so viel mitkriegt. Bim ufä laufä han ich ihn dänn gfrogät öb er mich mal chenti chlübä. Das ich merk das kein Traum isch. Und sit do simmer verlobt und freuäd eus riesig uf eusäs Hochzit.

02.03.08 16:53
Yasi 

Re: Wie habt ihr euch verlobt? Wer hat wen gefragt?

Also bi mir isch de Hürotsaatrag au sehr romantisch gsi. Bi ois isches eigentli immer klar gsi, dass min Fründ en macht und nöd ich. Mängisch hani mi schochli gfrooget, was er wohl wird mache. ich han dänkt, dass er sicher öppis mit Musig macht, will er sehr musikalisch isch und sälber Lieder schriibt.

Amene Friitigabig im Dezember 07 bini recht müed und gschafft vo de Arbet heicho. Woni i oisi Wohnig inechume isch alles recht dunkel gsi. Am Bode häts schöni Zweige gha mit Cherzli drumume. Die Händ sich zumene Wäg billdet. Woni dene Zwiig und Cherzli nachebin, bini is Wohnzimmer cho. Det isch es grosses Herz us Zwiig und Cherzli gsi und die ganz Stube isch eis Liechtermehr gsi. Hinter dem grosse Herz isch min Liebschte ghocket mit de Gitarre. Er hät aafange spiele und singe. Will er Franzos isch, hät er das Lied uf französisch gsunge. De Text handlet vo sinere tüüfe Liebi zu mir. im Refrain hät er denn gsunge, ob ich ihn wett hürote!!! Ich bin mega baff gsi und mir sind d'Träne numenoso abegloffe. Nachem Lied isch er vor mir uf d'Chnü und hät mich denn gfroget.

Es isch eifach mega schön gsi und immer wieder frog ich ihn, ob er mir das wunderschöni Lied vorspillt. Mich hät das sehr berüehrt, dass er es Lied allei für mich gschriebe hät. Mir sind voll happy und froied ois extrem uf oisi Hochzyyt im Summer 09.

03.06.08 11:17
Conny 

Re: Wie habt ihr euch verlobt? Wer hat wen gefragt?

Dr Atrag wo mi Fründ mir denn gmacht hett isch nüt speziells gsi, aber mega schön.
Es isch a üsem dritte Jahrestag gsi, am 14.12.07. Er hett für mi es mega leckers Dinner kochet u wo i bi heicho ha i afe mau ids Schlafzimmer müess ga warte (er isch äuä no nid ganz fertig gsi ) när hett er mir d Ouge zugha u mi ids Wohnzimmer gfüert wo aus isch mit Cherzli belüchtet gsi u überau hett Roseblüeteblettli gha...

Denn isch er vor mir uf d Chnöi u hett mi gfragt... was ha i äch gseit???


Wir heiraten: Frühling 2009

03.06.08 14:15
dragonfly 

Re: Wie habt ihr euch verlobt? Wer hat wen gefragt?

Mi Frönd esch en gebornige Romantiker.. so wieni..
Mer gönd drom au jedes Johr nach Afisl ines wunderschöns Romantikhotel.. A eusem letschte Obe (es hät meega gstürmt dosse) hät mi Engel gfonde, dass mer nochli use sölle goge laufe i Park. I hami zerst no gsträubt, do's Oktober gsi esch ond en sterneklari Nacht ond i nome es Chleid agha han.. Aber i ha de gmerkt, dass öpis ned stemmt, won er so wehemend drof beharrt hät.. So semer Arm i Arm (söst wär i erfrohre )use glofe.. Em Park häts en wunderschöne Pavillion, wo met Liechterkettine gschmöckt gsi esch.. Musig esch glofe ond em Pavillion esch en Tisch met Kerze, Champagner, Rose ond ere Glasschale met Roseblätter gstande!

Mi Engel esch oft Knü ond hät mi ufgforderet, dassi söll i die Roseblätter-Schalte puste.. Det enne esch mi Verlobigsring gsi! De hät er om mini Hand aghaltet!

I ben so ufgregt gsi, dassi keis Betz meh chalt gha han!

En Woche spöter hät er de no be mim Dad offiziell omt Hand aghaltet (bes det here esch eusi Verlobig gheim blebe!). I glaubs mi Engel esch bem Hand-Ahalte no vell nervöser gsi, wie woner me gfrogt hät! Aber au mi Dad ond de Rest vo de Familie händ sich resig gfreut!

Ond jetzt werd im September ghürotet.. I chas chum erwarte..


Wir heiraten am 6. September 2008!

03.06.08 18:41
Kaz 

Re: Wie habt ihr euch verlobt? Wer hat wen gefragt?

Bi eus esches eigentlich no rächt lostig gsi...
Mer send, vor Weihnachte, no im 07, in Wien gsi und do het er mol das Thema Hürate agsproche. Er het jo scho lang gwösst dass ich gern gli emol wör wälle... (Send au scho a Aperos und Hochziite iglade gsi und so chont mer druf zspräche... ) Mer händ denn eigentlich sozäge in Wien besproche dass mer im Früehlig 09 werded Hürate.
Das alles het aber no es gheimniss müesse bliibe, bes ungefähr eis Johr vorher. Ich han ebe mol blöderwiis erwähnt dass sozäge d Verlobig "nur" es Johr gültig wär... und er het mer no en "rechtige" Atrag wälle mache (er het gwüsst, dass ich gern eine gha hätt ), aber ebe es Johr vorher. Ich ben fast verzwiiflet i däm halbe Johr, häts doch so gern dä ganze Wält verzellt !!!
Anyway... ich ben dä halt chli dä Date go schnöffle und han dä 09.05.09 endeckt und em das au gseit.
Dä 9. Mai 08 esch dä emmer nöcher cho und mer händ vell gweztlet öber dä Atrag. Ergendwie esch au vell los gsi um die ziit, und ich han em dä no dä einti Tag klaut vor em 9. (iladig vo mim Onkel a sin 50igsch) und so esch es Friitig worde dä 9.Mai und es Johr vorher...
Ich han dä a däm Friitig dä ganz Tag gwösst, dass er mich am Abig werd froge... was es eigentlich ebe no rächt speziell gmacht het
Mer send dä i das Usflogsretaurant go ässe, wo mer (uf säbem Torm obe) zämecho send. Nacher het er mich in dunkle Wald gfüehrt wo er mich inen Jäger torm gscheckt het, wäred er no was vorbereited het. Schlussändlich han ich met ere Zöndschnuer es Fackelherz dörffe enzönde und wo das brönnt het, da het er offiziell no gfroget. Doch no Romatisch gsi, aber gwösst hanis halt...

Mer hürated wie scho erwähnt am 09. Mai 2009 und mer freued eus druf!

03.06.08 20:02
Murmeli 

Re: Wie habt ihr euch verlobt? Wer hat wen gefragt?

Min Schatz het zu mim Geburtstag es mega schwärs Päckli miteme *klong* vor mi anegstellt und grinst. Wonis uspackt ha gha, halteni e tüüri Chromstahl-Pfanne i de Hand. Das muess me sech mal uf dr Zunge la zergah. E PFANNE! Ha gschwankt zwüsche mi fröie (isch ebe eini gsi, woni scho laaang ha welle) und sie ihm übere Grind abzieh
Er het denn speter gmeint, er heig "nume min Gsichtsusdruck" wele gseh... Pfff!
Bevors mi het chönne verchutte, zieht er es chliises, quadratisches Schachteli underem Tisch füre und häbt mers entgäge. Sarkastisch hani denn gfragt, ob da dr Pfanneputzer dinne seig - und bi denn fasch in Ohnmacht gheit, wo das schöne Ringli füre chonnt. *seufz* Manne...



Kein Scherz: Wir heiraten am 1. April 09!

03.06.08 21:25
moneli 

Re: Wie habt ihr euch verlobt? Wer hat wen gefragt?

Mein Verlobter hat mir den Antrag am 18.11.2006 gemacht. Wir waren an einem Konzert der Dave Band (Berndeutsche, rockige Band), hatte etwas mehr als hundert Leute. Plötzlich nach der Pause stand er auf der Bühne, ich dachte er würde irgend eine normale Info durchgeben, aber nein er wollte, dass ich auf die Bühne komme. Die anderen Leute (einige kannten uns) jubelten und schrien so laut, dass ich den Antrag gar nicht wirklich hörte. Aber als ich die Ringe sah, wusste ich was los war und wir küssten uns. Nachher verliessen wir die Bühne wieder und das Konzert ging weiter. Ich war total überrascht und hatte an diesem Abend alles erwartet, aber sicherlich nicht den Antrag, obwohl wir schon wussten, dass wir heiraten möchten. Ich werde diesen Abend nicht vergessen, aber freue mich natürlich auf die Hochzeit am 9.8.2008.
Herzlichst moneli
PS:Falls ihr euch das Foto vom Antrag ansehen wollt:
http://www.nie-allein.ch/nieallein/ueberuns.php

 1 2 3 4
Roseblüeteblettli   quadratisches   S`TRAUMHOCHZEIT   Sehenswürdigkeiten   Liechterkettine   Chromstahl-Pfanne   Heiratsantrag   Miternachtsgottäsdienst   Läbensnotwändig   Roseblätter-Schalte   jaaaaaaaaaaaaaaa   gefragt   eigentlich   romantisch   Verlobigsringe   verlobt   Usflogsretaurant   Hochziitsgsellschaft   Kalendereintrag   Gsichtsusdruck