| Passwort vergessen?
Sie sind nicht angemeldet.  Anmelden
Wie und wann habt ihrs im Geschäft erzählt
 1 .. 5 6 7 8 9 10
06.03.13 14:26
Emma13 

Re: Wie und wann habt ihrs im Geschäft erzählt

ahahh ihr sind luschtig... wenns doch alli so würed denke... ich verstahn eifach nöd warum mär nöd eifach so chan hürate, muess doch nöd grad e Verbindig zumene Baby ha...

Ich han s grosse Problem das ich im April en neue Job afang und im Mai hürate, ich zerbrich mär jetz scho de Kopf wie ich das söll kommuniziere und han echt Angst dass das überhaupt nöd guet achunt. Aber was söli mache? Es isch jetz eifach so, verheimliche chanis ja wohl nöd und d Mitarbeiter kenni au nonig dasi chönt wüsse wie sie reagieret (vorallem de Chef) ich hoffe würkli das ich das ufem beschte Weg wird chöne mache, aber Angst hani scho chli devor...

06.03.13 14:32
himbeer 

Re: Wie und wann habt ihrs im Geschäft erzählt

ah emma, denn bisch ja inere ähnliche situation wie ich, nur isches bi dir sogar no chürzer bis zu de hochzit. ich denk wenn das ganz locker seisch und vilicht sogar en chline apero schmeissisch chunnt das scho guet. lüüt sind grad besänftigt wenns öpis chönd ässe :-)

06.03.13 14:36
Emma13 

Re: Wie und wann habt ihrs im Geschäft erzählt

Ja himbeer, finds u schwierig, weisch jetz da im Gschäft wüssets scho di meiste...

Han au scho an en Apéro denkt, aber denn bini chum en Monet det und organisier scho en Apéro? Weiss nöd, bin nöd die wo gern in Mittelpunkt staht, scho gar nöd weni d Lüt nonig mal kenne... finds echt schwierig, au will ich am 23. Mai de Tag scho duregeh han (zivili Trauuig) muesses ja denn wohl scho irgendwenn sege. Hoffentli reagierets guet.

06.03.13 14:42
elea 

Re: Wie und wann habt ihrs im Geschäft erzählt

emma a dinere stell wörd is velecht eifach am chef scho vorher sege. eifach nome well si der jetzt alles werde of din neue name irechte (email-aresse, names kürzel, beschriftung, visitenkarten). ond i denke wenn si das alles 1mönet spöter mönd äneder send chi sauer. weisch wini meine? i wörds eifach elei wege dem em chef vorher sege bevor det afosch schaffe!

ond sosch denki au machet doch en chline apero, wen d lüt das hende dore erfahre de gehts nor getuschel. aber wend alli zomene glas wiiswii ilade tuesch onds no bez snacks geht. de hend doch alli freud wenn me so öpis verchöndet!

06.03.13 14:44
Emma13 

Re: Wie und wann habt ihrs im Geschäft erzählt

elea, meinsch söllis scho säge bevor ich afange? denn müesstis ja jetz fast scho sege? Alüte oder es Mail? ich weisses echt nöd aber stimmt... du hesch natürli scho recht..

06.03.13 15:03
himbeer 

Re: Wie und wann habt ihrs im Geschäft erzählt

bi mir sinds ja fast 5 mönet nachdem ich agfange ha, da findis nd so schlimm wennis vorher nonig säge, oder?

06.03.13 15:06
snet 
Re: Wie und wann habt ihrs im Geschäft erzählt

@Emma13: Ich würde es erst sagen, wenn du auch angefangen hast zu arbeiten. Finde ich sonst irgendwie ein bisschen unsinnig... Wieso sollte sich auch das Geschäft stressen, wenn ein Mitarbeiter heiratet? So einen Gedanken habe ich mir noch gar nie gemacht.

06.03.13 15:15
Emma13 

Re: Wie und wann habt ihrs im Geschäft erzählt

@snet eigentli hani au nöd demit grechnet das ichs säge bevor ich starte, ich han eifach denkt ich sägs denn wenni scho paar Wuche det bin, wenni d Lüt echli kenne und de Chef vorallem (wirds ja wahrschinli eifach nur ihm säge) aber das mite Koordinate wechsle stimmt halt scho, weiss nöd.. fänds ja au nöd tragisch wenni halt denn die scho druckte Visitekärtli bis am Schluss mit mim aktuelle Name ufbruche (han ja s ganze Lebe so gheisse) und d Emailadresse ändere isch hoffentli kei allzu komplexi Sach...

Weiss nöd, fänds jetz eifach grad mega unagnehm wenn ich det müesst alüte und säge, ja han no wele mitteile das ich im Mai hürate... persönlich säge het sicher au wieder en anderi Würkig... aaach isch das blöd!

@Himbeer a dinere Stell wür ichs nonig säge... het ja no Ziit

Zuletzt bearbeitet am 06.03.13 15:17

06.03.13 15:31
himbeer 

Re: Wie und wann habt ihrs im Geschäft erzählt

ich würds au nonig säge emma. ich fänds jetz au chli komisch wenn extra weg dem tuesch alüte. meistens lieged d visitechärtli ja jetz au nonig grad ufem tisch wenn afangsch schaffe.

06.03.13 15:33
Emma13 

Re: Wie und wann habt ihrs im Geschäft erzählt

Ja, ich fang glaubs eifach a und segs denn so schnell wie möglich, wär mär jetz doch chli unagnehm wege dem müesse alüte/schriebe...

Hoffe dass sie nöd sauer sind, aber ja, chan ja au nüd drah ändere, en Kündigungsgrund isches ja wohl nöd, oder? :)

 1 .. 5 6 7 8 9 10
Gelegenheit   Hochzeitshomepage   Hochzeitszeitschriften   schwanger   freundschaftlicher   erzählt   arbeitskolleginnen   Ferienbesprechung   selbstverständlich   einfach   arbeitskollegen   Arbeitsverhältnis   Flitterwochen   Hochzeit   Mitteilungsaktion   einladungskärtchen   vorstellungsgespräch   Schwangerschaft   Geschäft   heiraten