@principessa: Wow, da hesch würklech mega viel chönne erledige! Also i finde da dir d Trauig dusse heit, bruchts gar nid wahnsinnig viel Deko. Gseht sicher ou so mega schön us, scho nur mit de Stüehl und so. Mir hei ds Apéro ja ou dusse und det dueni nur gad Pompoms häre wöui finde, dass es när gar nid meh brucht. Isch ja no Natur drum wo ou schön isch... Wie heit dirs de eigetlech vore? Heit dir sones Pavillon oder ä Tisch?
I würd vorhär fötele, süsch heit dir würklech mega weni Zyt bim Apéro!

@Lillian: Ah ja voll, wenn dr Flughafe so nöch isch heit dirs natürlich gäbig... Bi üs ischs halt so, dass mir so oder so mind. 1h im Zug hocke für a Flughafe. (also ussert mir gängte uf Bälp, aber das isch mir z tüür gsi bis jetz).

@Ablauf: Üse Ablauf isch so:
8.00 TZ und ig bim Coiffeur
10.00 Chleid alegä
10.45 Abfahrt zur Chille
11.00 Beginn Trauig
12.30 Apéro
16.30 Abfahrt zur Abälocation
17.00 ca. 30 min für Föteli GG und ig
20.00 Znachtässe
23.00 Beginn Party (Tanz GG und ig)

@Fotobooth: Öper het no gfragt gha wägem Hintergrund. Das weisi äbä ou no nid so genau. Da mir ja keini gstelltä Föteli mit dä Gäst wei mache, hei üsi TZ aus Fotobooth-Artikel sozägä so zwöi "Puppe" vo GG und mir gmacht wo d Lüt när mit ihne chöi sich Fötele. I mues d TZ de mau frage, wo sie die wei härä stellä. Je nachdäm müesst mä fasch sone Stellwand ha...

@broncos: Ah doof wägä dä Arbeitä und Prüeffige... I ha ou no 4 Afangs Juni, aber ha när no ei Wuche zyt bis zum Hochzyt und schiebä jetz eifach mal alles uf denn wo mir vorhär nümme längt. Ha zersch ou überleit obi ei Prüeffig söu ufs nächschte Semester schiebä. Aber denn wotti ja jetz no meh schaffe und de hani ou nid besser Zyt zum lerne. Drum probieris jetz eifach mal, schlimmstefalls muesi haut de no mal gah.

• Zitieren

Hoi Mitenand!!!

Also Tagesabläuf interessiered mich brännend! Ich han mini Probefrisur nächst DO und bin uuu gspanne was sie vo de Ziit her meint. Hihi! Nachher wird den mal de Plan fertig gmacht.

Malinchen: Hend ihr würklich nur 30 Minute für d Fotis... Isch das nöd extrem wenig?

Janedoe: Hey... Han der uf FB scho gschriebe! Wie gahhhts dir... Mir sind doch so gwunderig wie das Gfühl isch!!! Ich wünsch eu alles gueti...

Ich wünsche eu jetzt scho es schöns Weekend... Leider chumi garnüme dezue am Ball blible. Finds mega schad. Han kein Plan meh was bi eu so gaht... :( Und für de Post hani jetzt exakt 3 Stund gha... So müähsam!

Min GG und ich werded das Wuchenend eusi Ring go aluege gah und sini zwei Hämpper go abhole. Den dümmer mal alles vo A-Z ufschriebe und erledige! Mit Deadline!

• Zitieren

So mini Liebe, es fougt mi Bricht vo üsem Zivile gester... hoffe das wird nid auzu lang

Ig ha am 10i dr Termin gha für Frisur, Makeup und Negu, zum Glück aus am gliche Ort. Ha de no es Käfeli becho u de heimer gad mit de Negu agfange. Ha Gel-Lack-Negu la mache, ha das vorhär no nie gha aber bi auso suoer zfriede. ini TZ het mir ja ufe Geburi e Guetschin gschänkt. Ha e dunkurote Lack usgläse wo zu mim Chleid passt. När heimer mitem Makeup witergmacht und sie het mi u schön natürlech, aber glich sehr schön gschminkt, has super gfunge. Für d Frisur hani sone sitleche Wasserfallzopf wöue. Am Hingerchopf het sie de no mini 3 Blüemli inegsteckt und d Haar schön glöcklet. Vom Coiffeur bini de diräkt zum Bluemelade ga mis bsteute Strüssli hole. Ha eifach es chlis ganz eifachs bsteut u de het sie vo sich us no es Asteckerli füre GG gmacht, ohni dassi öpis ha gseit, so härzig. Und beides zäme für 30.-!
De bini hei und GG und ig hei schnäu no öpis Chlis gässe u hei üs när i Schale gworfe. GG het no mini Superman-Uhr uspackt und mega Fröid gha. Het sech die gad id Hosetäsche gsteckt Am viertu ab 1 si üs üsi TZ cho abhole und mir hei de nomau e Umwäg übere Coiffeur müesse mache, wüu ig mi Chopf sprich mis Iphone dert ha la liege Nenei mir si nid närvös...
Mir si de scho ca. am 2 zMurte acho und fasch aui Gescht si scho dert gsi. Ds Wätter hets zwar guet gmeint mit üs aber d Bise isch mega chaut gsi. Mir hei de aui im Innehof vom Schloss gwartet, bis üs d Standesbeamtin isch cho hole. Es hei de aui Gescht inechönne, nume mir und d Trouzüge hei no gwartet. De simer de o ds Türmli uf und is Trouzimmer ine. Es het es u härzigs so chli antiks Sofa gha für ds Brutpaar. Itz wos so würklech ärnscht worde isch, heimer beidi scho rächt Härzchlopfe becho. D Standesbeamtin hets würklech superguet und schön gmacht. Zersch het sie natürlech chli müesse Paragraphe abeläse, aber sie het viu zwüschine no Persönlechs dribracht und sech würklech sehr bemüeht. Vorem Jawort si de GG und ig ufgstande und hei üs üsi Trouverspräche gä. Woni dert so bi gstande si mini Bei extrem schlottrig gsi, hamer ächt müesse Müeh gäh dassmes nid gseht GG het hingedri gseit, ihm sigs glich gange . De isch dr offiziell Akt vom Jawort cho und das het si ganz simpu, ohni 7 Näbesätz, mit eire Frag gsteut und mir hei beidi lut und dütlech ja gseit, ha mega Fröid gha. När het sie ds Lied "Sag es Laut" vom Xavier Naidoo abglah, wo mir vorhär usgläse hei. De simer scho zum ungerschriebe cho und am Schluss het sie üs no paar Tipps mit ufe Wäg gäh fürne glungni Ehe. Paar luschtigi, aber o paar sehr wichtigi u gueti. Mir hei de gad vore chönne bliebe stah und d Gescht hei üs vore usegah aui gratuliert. GGs Papi und dr Fründ vo sim Mami hei ganz schön füechti Öigli gha .
Womer si usecho isch no es befründets Päärli vo GGs Mami cho zum gratuliere und het üs no es härzigs Gschänkli bracht. Mir si de ines Pärkli näbedran und GGs Mami und ihre Fründ hei äxtra Champagner und Gleser mitgnoh gha zum astosse. Hei de scho mau 2 Glesli trunke und när no paar Paarföteli gmacht mit dr Andrea. Es het zwar mega zoge und isch rächt früsch gsi, aber irgendwie hets mir gar nid viu usgmacht, bi so im Fium gsi... När simer langsam zum Schiffsalegestäg abegloffe und hei ufem Wäg o no paar Föteli gmacht.
Mitem Schiff simer de uf die angeri Seesite nach Praz (im Vully) und dert i das Paviöndli zu üsem Apéro. GGs ehemalige Schukolleg het dert ds Catering gmacht und isch scho vou im Elemänt gsi. Es het aus meeega feini Sache gä, so i Glesli serviert und sehr spezielli Sache. Obwou nid aus extremi Gourmets si (bsungers vo mire Site), isch aues sehr guet acho und d Lüt heisech chum chönne erhole wie fein dasses sig . GGs Mami het de no e 3l-Wyfläsche organisiert gha, wo aui hei chönne druf ungerschriebe und wo de vo däm Wychäuer gfüut wird mit üsem Hochzitsjahrgang . Dranne si 2 Helium-Härzballön ghanget. Mir heis usgiebig gnosse, quatschet u gschlemmet und mis Mami het no es Fotobüechli gmacht mit aus Föteli vo mir vor Geburt bis vori GG ha kenneglehrt, für ihn quasi . Soooo härzigi Idee und Überraschige! Ha o no es Rosehärz becho vo mim Mami und vom Wychäuer es grosses Chörbli mitme Bluemegsteck. Es isch scho fasch 8i gsi womer de si ufbroche und üs dr Fründ vo GGs Mami mitem Shuttlebüssli het uf die angeri Seesite gfahre. Vo dert simer wieder mit einzelne Outos zu üs gfahre und hei de no Kaffee und Kuchen gnosse. D Torte isch auso e voue Erfoug gsi, würklech o u fein usecho. Mini einti TZ het no e u feini Crème und e Fruchtsalat gmacht. Üsi chlini Stube isch vou Lüt gsi, aber es isch eifach schön gsi!
Mir hei würklech e wunderschöne Tag gha und i ha e riese Fröid a mim neue Nachname . Muesmi aber sicher no chli dragwöhne Aber isch o extrem gsi wie schnäu sone Tag verbigeit... itz fröie mir üs aber ersch rächt ufe gross Tag am 16. 8. und i bi sicher, die Zit wird so schnäu verbiga!

• Zitieren

Me: Ich weiss garnöd wasi da ihne in letschterziit verzellt han oder nöd... Haha! Ich bin am DO aber mit mim Mami und minere Oma uf Chleidersuechi! Und mis Mami isch fündig words!!! Im Modissa und het sogar no 30% übercho! Hihi... :Lounge: Ich dun eu gern es Foti poste am MO.

Hüt hend mir am 11i no Tanzkurs... Ich bin ja gspanne wie das usechund. Uf jedefall mussi nachher no chli go Sünnele, dass den s Chleid au schön usgseht a mir! Hihi...

Suscht hani mal en Prototyp bastled für d Zündhölzer und scho mal 30 Wasserfläsche kauft zum bechläbe mit eusne "Fötzeli"... Den gsehts garnüme so schlächt us mit euere Planig.

Ah no de Bestie mir hend ja nie fürschi gemacht mit DJ... Jetzt hämmer sogar zwei! GG Papi het eine organisiert bzw. eine wo er kennt - sind aber i eurem Alter nöd irgendwelchi Opas... Und die Machers GRATIS!!! Soooo cooooolll!!! Jetzt mümmer aber unbedingt no en Termin finde, wo mer mit denen mal alles bespreche chönd. Das isch so katastrophal im Moment bi eus. Macht mich halbe anderst...

Am DI inere Wuche gömmer nomal bi eusere Lokation verbie will mir mit em Hauptgang nonig glücklich sind. Denn mümmer eus aber entscheide... Chund scho guet. Ich han uf jedefall d Menucharte scho im gliche Design gmacht wie eusi Iladige. Den mussi das nurno ifüäge wo mer gwählt händ und ABSCHICKE. Es sötti Ziitlich den glaub scho no lange.

En schöne Sunntig wünschi allne no!!!

• Zitieren