| Passwort vergessen?
Sie sind nicht angemeldet.  Anmelden
smile09 traut sich im sonnenschein!
 1
23.05.08 09:35
nordliecht 
smile09 traut sich im sonnenschein!

liebe smile09
morgen ist es endlich soweit. all die tage der vorbereitungen und mühe darfst du morgen geniessen und werden eure gäste bestaunen. du wirst sicherlich eine wunderschöne braut sein! ich wünsche dir für euren wichtigen tag, gäste die sich mit euch freuen, zwischendurch auch einen ruhigen moment nur für euch und vorallem liebe liebe liebe das wetterglück habt ihr ja sowieso gebucht
natürlich bin ich auf einen bericht gespannt von dir. du bist quasi die erste die dieses jahr in das rennen geht. wir anderen bräute können sicher noch viel von euch lernen

alles liebe
nordliecht


miär freyid eys uif de 6.juni 2008 & 6. septämber 2008 :-)

23.05.08 12:12
smil09 

Re: smile09 traut sich im sonnenschein!

Hallo nordliecht
Viele, viele Dank für Din nette Itrag! Hät mi sehr greut. Bi natürlich scho chli nervös aber i freu mi mega Bi froh, dass jetzt s'Wetter doch no mitmacht. Hät nöd immer so guet usgseh...
Natürlich tueni Eu dänn gern verzelle wie's gsi isch. Allerdings dänn ersch im Juni wil zersch gömmer no ä Wuche go wellnesse. Und dänn isches bi Dier jo au scho bald so wiet, zumindest mol zivil

01.06.08 16:40
smil09 

Re: smile09 traut sich im sonnenschein!

Fortsetzung....(hät nöd alles Platz ka)
Luschtig isch natürlich au gsi, wie ich als Brut vo allne agstarrt worde bi. D’Chind im Zoo händ bsunders Freud ka a mier. Mier sind nach dä
Füehrig mit dä Fotografin zämä no chli länger i dä Halle bliebe zum nomol äs paar Föteli mache. Wo mer use cho sind, sind alli mit Ballön dött gstande. Das isch ä schöni Überraschig gsi. D’Ballön händ Chärtli dra ka wo jedes öppis druf gschriebe hät wo’s üs würde geh oder helfe falls dä Ballon gfunde und zrugg gschickt wird. So hämmer jetzt äs paar Nachtesse zguet und Hilf um Garte.
S’Esse hämmer dänn i üsem Lieblingsrestaurant in Baden ka. Au das isch guet und schön gsi. Äs hät äs paar chlini Darbütige und Rede geh und mier händ no chöne bewiese, dass mer im Tanzkurs glernt händ Walzer tanze. I mues säge, mim Ma hät da besser im Griff ka als min Schwiegervater aber au dä hämmer über d’Bühni brocht. Mier händ än DJ ka und so hämmer nach äm Esse dänn au no chli chöne eifach so tanze.
So, jetzt hani ziemlich viel gschriebe. Für Froge und Tipps stohni gärn zur Verfüegig. I cha mi uf jede Fall däm Tip aschlüsse wo mier im Vorus übercho händ: Dä Tag goht schnell verbi. Drum versueched eifach jedi Sekunde z’gnüsse. Au wänn mol öppis schief lauft oder s’Wetter nöd mitmacht – äs isch Euen Tag und er isch bestimmt wunderschön.
Zum Schluss no, alli die wo wie mier äs paar Täg is Hotel Gams in Bezau gönd, Ier chönd Eu freue. Es isch traumhaft! I bi sehr ungern wieder hei.
Mier selber freued üs jetzt no uf 6 schöni Flitterwuche im November/Dezember wo mer dänn ä chli wieter weg flüget.

01.06.08 16:43
smil09 

Re: smile09 traut sich im sonnenschein!

Oje, jetzt hät's än riese Durenand geh... Dä wär dä erscht Teil!!

I ha kein geignete Ort gfunde für än Bricht, also schrieb än do.
Eis vorweg: Dä 24.05.08 isch für mich än wunderschöne Tag gsi woni immer wieder wird dra zrugg dänke.
S’Wetter hät nur fascht mitgspielt aber wäg däne paar Regetröpfli isch üsi Hochzeit kei bitzli weniger schön gsi. Jetzt aber dä Reie no. I ha d’Nacht vorher bi minere Muetter verbrocht. Agfange hät’s dänn für mich am 6.15 am morge, wo mini Coiffös zu üs cho isch. Wach gsi bini sowieso scho viel früener drum hät mer das usnahmswies gar nüt usgmacht. Mier händ dänn au guet 4 Stund brucht bis ich und mini Schwöster als Brutfüehrerin frisiert und gschminkt gsi sind. Dänn hämmer au scho müese abfahre. Normalerwies bini öppe ¾ bis 1 Stund underwägs vo minere Familie bis zu üs hei. A däm Tag hämmer aber keis Risiko wölle igoh und händ drum knapp 3 Stund zum fahre und alege iplanet. Natürlich isches dänn guet glaufe. Nachdem mer mini Schwöster und mini Muetter gholfe ka händ mit alege hani dänn halt no viel vorig Zit ka und ha nüt anders chöne mache als di nervös umelaufe. Endlich isches dänn so wiet gsi. Mier händ uf äm Parkplatz gwartet bis alli i dä Chile gsi sind. Plötzlich isches ganz schnell gange. Während dem mer d’Fotografin dusse no s’Chetteli richtig drüllet hät, hät dinne i dä Chile d’Organistin scho agfange mit äm Hochzitsmarsch. Drum hani dänn gar kei Zit me ka zum nomol tüf dure schnufe. Entschprechend bini au nervös gsi. Ich ha s’Gfühl ka ich zittere am ganze Körper und ich ha mich extrem müese zäme neh, dass i nöd scho bim inelaufe i Träne usbrucho bi. Min Ma hät mer nachher dänn au gseit ich heg ziemlich verchrampft usgseh….Trotzdem isches äs schön’s Gfühl gsi mit mim Vater zämä i d’Chile z’laufe. I dä Chile hani mi dänn langsam beruhigt. Träne sind scho no äs paar mol glaufe, aber dänn hani’s mier au „erlaubt“. Wo mer us dä Chile use cho sind hät’s Lüt ka vo üsne Verein und Firmene wo Spalier gstande sind. Nachher händ üs alli gratuliert. Es isch lang gange bis die ganz Schlange vo Lüt dure gsi isch. Nachher hämmer no chönne verusse Paarföteli und äs paar Gruppeföteli mache. Dänn hät’s agfange tröpfle und mer händ die letztsche Gruppefötel no müese i dä Chile mache. I bi froh, dass mer die wichtigschte Föteli und dä Apero händ chöne under freiem Himmel mache. Vom Apero händ mier selber übrigens praktisch gar nüt gseh. Mier händ am Afang schnell agstosse zum’s Buffet eröffne. S’Glas isch üs dänn aber schnell wieder weg gno worde wil’s im Weg gsi isch. Wo mer dänn nach äm fötele no öppis händ wölle esse isch s’Buffet leer gsi. Zum Glück hät’s no äs paar Schiebe Brot ka. I ha jo schliesslich sit am 5i am morge nüt me gässe ka. Mier händ zwei Stund ka für Apero und Föteli. Das isch ener knapp gsi, vor allem au will dä Turnverein no äs Spieli organisiert hät wo ziemlich viel Zit beansprucht hät.
Nachher simmer mit dä gladene Gäscht i d’Masoala Halle im Züri Zoo.

02.06.08 08:42
nordliecht 
Re: smile09 traut sich im sonnenschein!

ich freue mich, dass ihr einen wunderschönen tag geniessen konntet! Hattest du am anderen Tag keinen Muskelkater vom Dauergrinsen, höre dies immer mal wieder

Wenn es das Budget noch zulässt, werden wir sicher noch ein paar Tage im Hotel Gams verbringen, erst recht nach deiner Empfehlung.
Hast du dich an den neuen Namen schon gewohnt (du hast ihn glaube ich angenommen, oder?)

Griässli
nordliecht


miär freyid eys uif de 6.juni 2008 & 6. septämber 2008 :-)

04.06.08 08:17
smil09 

Re: smile09 traut sich im sonnenschein!

Hallo nordliecht
Nei, Muskelkater hani nöd ka, obwohl mä natürlich scho dä ganz Tag am i d'Kamera und au suscht am lächle isch.
A min Name hani mi no nöd würklich gwöhnt. I bi zwor selber erstunt, dass i am Telefon no nie dri keit bi. I muemer aber scho jedes mol wäni s'Telefon abnimm zersch überlegge wani mues säge. Underschriebe hani scho äs paar mol falsch (aber nöd uf äm Standesamt). Da goht eifach so automatisch. Bis jetzt sind's aber immer Sache gsi wo me eifach nomol hät chöne usdrucke. Das erhöht halt eifach ä chli dä Papierverbruch im Büro....

 1
Underschriebe   d’Fotografin   Hochzitsmarsch   d’Organistin   Papierverbruch   zwischendurch   Lieblingsrestaurant   wunderschöne   Schwiegervater   smile09   wichtigschte   vorbereitungen   sonnenschein   wunderschönen   Entschprechend   Normalerwies   nordliecht   Brutfüehrerin   schliesslich   natürlich