Anmelden Anmelden[ x ]          
| Passwort vergessen?
Registrieren  |  Suche Anmelden
Forum    ›   Anlässe    ›   Zivilhochzeit    ›   Üsi Ziviltrauig bi strahlendem Sunneschii
Üsi Ziviltrauig bi strahlendem Sunneschii
 1 2 3
Flintstones  am 14.03.2011

Üsi Ziviltrauig bi strahlendem Sunneschii

Sooo, jetzt wog i mi au a üsen Bricht vo de zivile Trauig ane. Und s git soooo viel, wo me gern möcht teile und irgedwie eifach nit chan in Wort fasse. Drum verzeied mir, de Bricht chönti lang werde. Aber i fange mol am beschte vo vorne ah.

Am Fritigmorge hend mir no gschaffet, was üs glaubs beidne sehr guet tue het. Am Morge bini no ussergwöhnlich ruhig xi. Das han ich vo mir gar nit so kennt. Mini Arbeitskollegin (wo igweit xi isch) het mi no miteme feine Znüni überrascht. Sie het es riese Partybrot in Herzform mitbrocht und het mir nur zuezwinkeret und gmeint "du weisch jo wieso". I bi so nöch dra zue gsi, zum mis "Gheimnis" zlüfte, aber has mir denn doch chönne verkneife. S hend nit viel Lüt gwüsst, dass mir jetzt scho zivil hüroted. Do bini s erschte mol ziemlich emotional worde a dem Tag. Aber bi schnell wieder abglänkt xi, zumindescht bis i Firobed ka ha. Schaffe im Chindi und do lauft viel z viel, als dass me no anders cha studiere.

Wo mir beidi üs denn dehei wieder troffe hend, sind mir sowas vo nervös xi. Mir hend üs zersch mol richtig lang und intensiv umarmt und i ha bi mim Schatz so richtig gmerkt, dass an ihm alles "bebt" - so hibbelig han ich ihn selte erlebt. Mir hend beidi nit würklich möge Zmittag esse und so isch de Mittag schnell verbi gange und jedes isch no zu sinem Coiffeur. Mini Coiffeuse isch so ruhig xi, sie het mi richtig wieder obe abe gholt und mir e schöni Frisur zauberet. I ha mi eifach wölle überrasche loh und ha kei spezielli Wünsch ka, usser eifach hochgsteckt.

Won ich heicho bi, het min Schatz und mis Mami scho de ganz Apéro bi üs i de Wohnig vorbereitet ka. So hend mir denn richtig schön Zit ka zum üs umzüche und i ha mi no in Rueh gschminkt. Min Schatz het mi miteme wunderschöne Brutstruss überrascht und er het sogar no en passende Astecker ka! Eifach perfekt! I ha zwar ghofft, dass i en Brutstruss überchume, aber i dem ganze Trubel han i gar nüme derno gfrogt… I ha so Freud ka, dass bi mir es paar Trändli kulleret sind. Aber das sind denn au die einzige xi für de Tag. Ha mi nocher guet unter Kontrolle ka. Und denn sind scho gli die andere Familiemitglieder itrudlet. E viertel Stund vor de Trauig sind mir denn dehei losmarschiert. Mir sind beidi i de Zwüschezit gar nüme soooo nervös xi wie am Mittag. Aber glich no gnueg agspannt ... Mir sind de Stross noglaufe, de Weg isch gar nit wit xi is Standesamt. Nur 3 Minute ... D Reaktione vo de Lüt sind luschtig xi. Autos hend üs zueghuupt, gwunke hends, zuezwinkeret ... Richtig schön, aber schono komisch, wenn wildfremdi Lüt so uf ein reagiered. Do mir no chli zfrüeh xi sind, hend mir verusse no gföttelet und denn hend mir au scho inechönne. Es anders Paar isch grad use cho usem Trauigszimmer, die sind z vierte xi. Hihi und mir sind vo 20 Familiemitglieder begleitet worde. - i weiss, mir hend halt e grossi Familie. Aber i bi happy xi, dass alli grad schön Platz ka hend und bi de Trauig hend chönne debi si.
I muss ganz ehrlich säge, soooo viel weiss i gar nüme vo de Red vom Standesbeamte. Anschiinend het ers aber guet gmacht. E gueti Mischig zwüsched nochdenklich und trotzdem no humorvoll. Und de Standesbeamti isch sichtlich au nervös xi! Isch also nit nur mir ufgfalle. I ha mini Emotione guet unter Kontrolle ka. I ha scho befürchtet, dass es paar Trändli werdet flüsse (wär jo au nit schlimm xi). Aber has grad no chönne zrugghebe. S JA isch lut und dütlich cho, vo beidne. Hihi au de Standesbeamti het gmeint: „Das het überzügt tönt.“ Min Schatz - min Maa - het mi miteme richtige Chuss überrumplet.

Do mir die letschte xi sind, hend mir d Gratulatione spontan no im Trauigszimmer entgege gnoh. Richtig schön xi, wie sich alli gfreut hend. Wo mir use cho sind, sind sogar no es paar Lüt döte gstande, wo üs überrascht hend. Obwohl mir's eigentlich fascht niemerem xeit hend. Natürli hend mir üs sehr gfreut derüber. Mit witere Blueme sind mir überhüfft worde. Uh schön! S zivile hend mir würkli eifach mit de Familie wölle teile. Aber die paar Überraschigsgäscht hend mir denn eifach grad au mitgnoh zu üs hei zum Apéro. S het nämlich vorig gnueg Sache ka, mini Mama het sich voll is Züg gleit.

So hend mirs gnosse und noch zwei Stund sind mir mit de Familie ufbroche go ässe zumene Italiener. Soooo fein xi und alli hend selber chönne usläse, was sie möchted bstelle. Das isch guet acho bi allne. Mir hend's üs guet go loh und sind denn irgedwenn hundemüed im Bett glandet ...

S isch sooooo schön xi und goht eifach viel z schnell verbi. Aber mir freued üs jetzt riesig uf üsi chirchlich Hochzit im Juni - 103 Täg gohts no!
De Tag isch für üs zwei eifach perfekt xi. Es sind chlini Moment, Überraschige, Geschte, liebi Wort wo de Tag zu so öppis einzigartigem mached.

Zuletzt bearbeitet am 14.03.2011



PrinzessinN

nicht registriert

am 14.03.2011

Re: Üsi Ziviltrauig bi strahlendem Sunneschii

Danke für deinen Bericht. Dein Tag hört sich sehr schön, entspannt und wunderbar an. Freut mich, dass ihr es so gut gehabt habt .
Herzliche Gratulation!!!! Wünsche Euch nur das Beste und dann eine schöne kirchliche Hochzeit in 103 Tagen .

Alles Liebe!

...Today, Tomorrow And Forever...You'll always be my love...8. Oktober 2011



trobadora  am 14.03.2011

Re: Üsi Ziviltrauig bi strahlendem Sunneschii

Au vo mir herzlichi Gratulation und viele Dank, dass din Tag mitemene Bricht mit üs teilt hesch!



Palchen  am 14.03.2011

Re: Üsi Ziviltrauig bi strahlendem Sunneschii

Klingt nach einem wundervollen Tag
Da bleibt mir nichts anderes übrig als zu Gratulieren!!

Lg Palchen

@-->-- Zivil 20.05.2011 --- Freie Trauung 28.05.2011 --<--@



elchalten  am 14.03.2011

Re: Üsi Ziviltrauig bi strahlendem Sunneschii

Hoi flinstones:
wuensche dier und diem ma alles liebe und gueti zur hochzyt!

dass toent ja nachemne perfekte tag!!! tolle bricht!!! danke fuers teile! ganz bsundrigs schoen hani dini leschte wort gfunde:

"De Tag isch für üs zwei eifach perfekt xi. Es sind chlini Moment, Überraschige, Geschte, liebi Wort wo de Tag zu so öppis einzigartigem mached"

i saege ja immer, dass genau die sache, womer nid cha plane, schluss am endi dr tag so eimalig mache :-) schoen, dass du mini istellig bestaettiget hesch :-)

gruessli



Belle85

nicht registriert

am 14.03.2011

Re: Üsi Ziviltrauig bi strahlendem Sunneschii

Liebe Flinstones

Herzlichen Dank für deinen wundervollen Bericht. Ich freue mich für Euch und wünsche Euch alles erdenklich gute für euer Eheleben!

Ganz liebe Grüsse Belle


Wir feiern das Fest unseres Lebens 28.05.2011



Veligandu  am 15.03.2011

Re: Üsi Ziviltrauig bi strahlendem Sunneschii

Habe eben deinen Bericht gelesen und möchte mich den Wünschen der vorigen Gratulanten anschliessen.

Ich wünsche euch beiden eine wunderschöne gemeinsame Zukunft.

---------------------
Wir tauchen in unser neues Abenteuer am 11.06.11



coco11  am 15.03.2011

Re: Üsi Ziviltrauig bi strahlendem Sunneschii

Liebe Flintstones

Danke für deinen Bericht! Ich gratuliere dir und deinem Mann von ganzem Herzen und wünsche euch nur das Beste auf eurem gemeinsamen Lebensweg! Und natürlich weiterhin viel Spass bei den Vorbereitungen.

Liebe Grüsse
coco

Wir freuen uns auf den 23.07.2011



Franziska

nicht registriert

am 15.03.2011

Re: Üsi Ziviltrauig bi strahlendem Sunneschii

Liebi flinstones, ou i möcht meh met mine Grüess a euch aschlüsse.....i wösche euch ebefalls vo Härze alles Liebi ond gnüssed d Vorreud no bes zo de chirchleche trauuig....gloub mers, ou deet wärde deer sälber dini schöne Wort vom Schloss weder en senn cho....alles gueti, Lg Franziska

26. juni 2010, unser schönster tag....



Proeschu  am 15.03.2011

Re: Üsi Ziviltrauig bi strahlendem Sunneschii

@flinstones

Danke vell mol för din Bricht, er esch eifach meeega gsi!
da froit mer sich gard no of din Bricht vode kirchliche Hochzig!

wenn stoht denn bi der di kirchlich Hochzig a? Mer hürotet drom au im Juni!

.... wir brauchen nicht.... wir müssen nicht.... wir wollen einfach.....
HEIRATEN! 1. & 4.6.2011



 1 2 3

ÜBER UNS

HOCHZEIT.ch ist ein unabhängiges Portal und beliebter Treffpunkt für Brautpaare und Dienstleister aus der Hochzeitsbranche.