| Passwort vergessen?
Sie sind nicht angemeldet.  Anmelden
Vorbereitungen Zivilhochzeit
 1 2
11.04.08 16:32
Carola 
Vorbereitungen Zivilhochzeit

Hallo zäme!
Ha bes jetzt euchi Biträg emer nor döregläse, aber etz han ech ou mou e Frog. Mine Frönd ond ech wend im Juli 2009 hürote. So wie ech bes etz do gseh, send scho vell am vorbereite, wo ou erscht im 2009 hürotid. Ech be emmer am luege wäge schöne Reng, welles Datom genau, Gästeliste ond so witer. Aber wenn ech bi mim Frönd met dem Thema afo, denn wächslet er emmer weder ganz schnöu s Thema, eifach wöu ers Gfühl hed, dass etz no vell zfrüeh esch ond dass ou ändi Johr oder nöchscht Johr no länget (ech ha ehm öbrigens d Atrag gmacht, ha eifach nömm chöne warte ). Ech weiss, dass är das ou wott, aber mech närvt, dass ech met ehm eifach noni öber das cha rede, wörd doch so gärn chli met ehm plane. Wie louft das bi Euch so?

11.04.08 16:55
Manuela24

nicht registriert

Re: Vorbereitungen Zivilhochzeit

Hoi Carola

Mach Dir kei Gedanke, Manne sind wohl so.

Mir hüratet am 06.06.09 und ich bin scho voll am plane. Ha für alles Liste erstellt und bin im Internet am umeluege etc. Min Schatz und au min Vater findets au z'früeh. Aber ich lah mich vo dem nöd abbringe. Immerhin sinds jetzt au chli verschrocke. Will wo mer s'Restaurant reserviert händ, häts gheisse, dass mer mega Glück heget - all andere Samstig im Juni hegets scho bsetzt gha. Da isch dä Manne mal chli bewusst worde, dass mer nöd alles kurz vorher mache chan.

Wünsche Dir viel Spass bim plane - und wirsch gseh, irgendwenn macht Din Schatz denn au mit. Nur Geduld ha.

Lg

Manuela

11.04.08 17:01
Carola 
Re: Vorbereitungen Zivilhochzeit

Hey Manuela24!

Ech be ächt froh, dass ech ned die einzig be, wos eso god. Met mine Eltere redi gar ned dröber, de Vater fendt, mer söll erscht hürote, wemmer schwanger esch! Ond ech ha emmer gseid, ech wott zerscht hürote ond de eifach s verhüroted si s zwöite gniesse. Äbe jo, Manne. Ech wett wenigstens gärn afe mou es Datom festlege. Ech hätt gärn im Juni ghüroted, aber mine Frönd hed denn no Wk ond ech ha am 11. Juli no en Pröfig, wöu ech no en Schuel mache, d.h. es werd metti Juli, schiesst mi scho chli a. Aber jäno. Mou luege, wies witer god.

11.04.08 20:40
Fischli 

Re: Vorbereitungen Zivilhochzeit

Jojo das kenn ich au. mir wüsset jetzt scho mol s Datum für die chirchlich Hürot im Juni 09, aber min Fründ meint amel au, da got jo no so lang. Aber so lang er mich lot umeluege und umefroge isch mir das eigentlich glich. Er kunnt denn schono gnueg früeh druf, dass en huufe z erledige git.

lg fischli

15.04.08 22:01
chickpea 

Re: Vorbereitungen Zivilhochzeit

Hallo Carola

S goht mir ähnlich wie dir! Sit Wuche stürm ich, dass ich es Datum möcht feschtlege, ich mach drum au no en Usbildig und bi am Vor- und Nochteil abwäge vo Date. Ich möcht eigentlich gärn im Juni nächst Johr hürote. Er wohnt öbä nonig in der Schwiz, das macht s ganze e chli schwierig.
Ich hoffe, du weisch bald meh!
Griessli
Chickpea

16.04.08 08:25
smil09 

Re: Vorbereitungen Zivilhochzeit

Hallo Carola
Mier isch äs au ähnlich gange. Mer händ zwor s'Datum no relativ schnell feschtgleit (scho am 24.05.08) aber nachher isch äs eifach nöd wieter gange. I ha ä Zit lang s'Thema Hochzit kum dörfe aspreche ohni dass min Zukünftige gnervt gsi isch, dass i scho so früe alles wöt plane. Irgendwenn hani dänn äs paar Sache eifach mol i d'Hand gno. Underdesse isch guet und er isch au viel am mithelfe und organisiere. Mier sind aber teilwis scho chli im Stress wil's halt eifach viel git zum organisiere (mier mached au viel selber). Es isch glaub würklich chli äs allgemeins Manneproblem. I bi aber immer no dä Meinig, dass sich früe afange uf jede Fall lohnt.

16.04.08 17:21
Carola 
Re: Vorbereitungen Zivilhochzeit

Hallo zäme
DAs beruhigt mech zemlech, dass das ned nor mer so god. Ha scho bedänke gha, öb ers sech ächt andersch öberleid hed. Aber er hed doch letscht mou es Büechli met Reng agluegt, won ech heigno ha ond hed es paar schöni zeigt. Aber ech gloube s Datom god of Dütsch gseid am Arsch verbi. Es esch em eifach egal wenn. Ech leg etz den eifach eis fescht ond denn moss är ome si. Mer mönd sowieso ou nochli Röcksecht of üsi Trouzüge, wöu är det ou no Schuel hed ond so. Jo, das werd scho. Ha scho mol S Menu usgsuecht ond grächnet. Hed jo ou Vorteil, wenn mer cha mache, wie mers wott ond niemer driredt.

17.04.08 00:47
Nicole80 

Re: Vorbereitungen Zivilhochzeit

hallo carola
jaja, die lieben männer. wir hatten auch kürzlich unseren ersten hochzeits-krach. wir heiraten im semptember 08 und haben 1 jahr vorher zu planen begonnen. ich finde, das reicht gut (ausser bei einem speziellen datum).

mein schatz ist, im gegensatz zu mir, gar kein organisationstalent. ihm ist die hochzeit wichtig, er kriegt aber seinen hintern nicht hoch! jetzt haben wir das ganze aber geklärt. ich finde, wir müssen auch akzeptieren, dass die meisten männer eben nicht jeden tag von hochzeiten, ringen, kleidern sprechen möchten. da sind sie eben doch anders. und wenn man ihnen ständig jedes neue bild und jede neue idee präsentiert, werden sie nur genervter und machen erst recht nichts. schliesslich sollte auch das normale leben noch platz haben. sonst weiss man dann ja gar nicht mehr, was man nach der hochzeit machen soll...
das heisst ja nicht, dass man selber nicht so viel stöbern kann, wie man mag. man könnte ja einfach so einmal die woche zusammen sitzen und besprechen, was alles zu tun ist. das wäre dann so was wie ein kompromiss und darum gehts doch immer in beziehungen

lg nicole

25.04.08 16:25
Nepi 
Re: Vorbereitungen Zivilhochzeit

Hallo

Ich kann Dir dazu nur sagen, dass man die "guten" Lokalitäten ein Jahr im voraus buchen muss, wenn man ein bestimmtes Datum hat. Wenn man flexibel im Datum ist, dann geht es wohl noch eher.

Darum ist eine frühzeitige planung notwenig.

25.04.08 16:44
madmadi 

Re: Vorbereitungen Zivilhochzeit

Be üs genauso...

Ei Tag nachem Atrag hani afo Brutheftli poschte ond omeluege ond schneugge... ond jedes Mou, wenni en Idee gha ha send so eitönigi Antworte cho oder er het völlig abblocket. De Bsuech vo de HOCHZYT in Sursee esch denn de Gipfel vo mim Brutfruscht gsi, woner mer hindenoche glaufe isch, als gieng ehn die ganzi Sach nüt a. Alles esch Schischi gsi ond sowieso z tür ond ond ond...
Denn hani also ou Zwifel gha, öb är das ächt wörkli wott ond hanem emou Füür onderem A..llerwärtischte gmacht. Hanem gseit, die Sach müesst ehm mindischtens so wichtig si, dass är för öppis z organisiere d Finger usenimmt, öb das d Flitterwoche, d Ringe oder was ou immer seig, aber irgend öppis müess är mache. Das het klappt, i Sache Hochzitsreis hani so guet wie nüt müesse mache...

Jetzt goht's no drü Mönet ond langsam aber sicher merkt ou mi Liebschti, dass d Zit lauft - nor hani jo unterdesse scho sehr viel organisiert (natürli ned ohni Absproch met ehm, aber d Initiative esch emmer vo mer us gange).

Ich ha während dere Zit feschtgstellt, dass es ehm viiiel weniger um's Fescht goht, als um's eigentliche Hürote. Er het ou gseit, er wett för's Fescht eigentli ned so viel Gäld usgä ond lieber schöni Flitterwoche mache - esch jo ned ganz vercheert, aber i ha halt sit eh und je vomene schöne, rauschende Hochzitsfescht träumt ond do hämmer öis jetzt halt chli müesse arrangiere.

Aber es het klappet ond i glaube, mer wärde en wunderschöne Tag dörfe gniesse! Freue mi so druf!!! Ond das sötte alli Brüt, wo ähnlechi Manne händ ou! Suechet euch en Fröndin, woner chli chöned schwärme ond wo met öich stundelang Heftli ond Prospäktli aluegt. Nor Geduld, d Manne händ eifach chli länger...

Grüessli
madmadi


Ich hürote mi Schatz ganz genau 10 Johr nach öisem erschte Koss, am 8. August 2008!

Editiert 25.04.08

 1 2
lostelefonieren   Zivilstandamt   feschtgstellt   Schlaftebletten   zusammengetragen   informationen   Zivilstandsamt   organisationstalent   hochzeits-krach   Personalstandausweise   Vorbereitungen   reservationen   Zivilhochzeit   Manneproblem   Organisation   Flitterwoche   organisiere   llerwärtischte   Hochzitsfescht   schliesslich
Erstellen Sie mit wenig Aufwand und ohne Vorkenntnisse Ihre eigene Hochzeitshomepage mit unabhängiger Wunschliste!