Hallo zusammen,

unsere Planung nimmt so langsam Formen an! Wir sind uns nur noch nicht einig, ob wir in in Retaurant gehen (Landhaus Ettenbühl oder Fahrbar) oder ob wir eine Location mieten (Ostquai, Gewächshaus oder Villa Wenkenhof) und wir einen Caterer engagieren.

Ich habe diverse Offerten eingeholt und komme bei meiner Caterer Kalkulation immer auf einen sehr hohen Preis.. Meistens so um die CHF 8'000 - CHF 9'000. Das finde ich ziemlich teuer, zumal es sich nicht um ein Gourmetmenü handelt, sondern um ein ganz einfaches Büffet, der Apéro ist auch nicht eingeschlossen. Das liegt vielleicht auch daran, dass ich v.a. bei den Getränken und den Personalkosten sehr hoch kalkuliere.
z.B. 60 Flaschen Wein, 60x Bier, 60x Kaffee und 60x Mineral und die Personalkosten kann ich irgendwie auch nicht einschätzen.. hmpf. Bis jetzt habe ich nur Offerten erhalten wo einfach der Stundenansatz pro Servicekraft angegeben ist, aber nicht mit wie viel Servicepersonal und Stund dann effektiv gerechnet werden muss.

An diejenigen, welche Ihre Hochzeit schon hinter sich haben resp. eine detailiertere Offerte vorliegen haben, auf wieviel CHF p.P. kommt ihr für:

- Personalkose
- Transportkosten
- Mobiliar (je nach Location)
- Tischwäsche
- Buffet
- Getränke
- ?

• Zitieren

Hallo slash

Wieviel lüt sit dir? Dr pris isch jo meistens pro person und denn chömme no d pauschale drzue! Wenn du es komplettagebot willsch mit allem drum und dra muesch halt scho metemene hoche betrag rechne.... Usser das wer für 20 nase denn ischs huere tüür....

• Zitieren

ich bi nonig soo lang am plane und ha au nur ei offerte igholt, aber 12'000.- dunkt mi nöd wahnsinnig viel für 60 persone und mit dem programm... grad wenn de wii au inbegriffe isch. au wenn de apero selber machsch und deko, zuetate und material ichaufe isch ja au nöd gratis.

aber zum vergliche: eusi offerte für 100 persone imene restaurant in züri für flying dinner isch ca. 10'000.-, det isch aber nur korkgeld debii und de wii müend mer no sälber bringe. und das isch wie gseit flying dinner, also meh en grosse steh-apero. defür sind halt personalchöchte scho drin will mer im restaurant fiired, vilicht isch das glich günstiger? ich denk mit chf 100.- pro person muesch mindestens rechne für esse und trinke und ebe bimene catering chunnt denn halt no spersonal dezue...

• Zitieren

Also ig cha dir eifach soviel säge, bim Esse chasch je nachdem was dir weit scho spare wenn du z.b anstatt en caterer ä metzgerei afrogsch.. Die si meischtens günstiger oder halt eher chli uf em Land es Resti afroge wo au no Cathering macht!

Ig würd mir mol grundsätzlich überlege was du willsch und öb Buffet oder Mehrgänger und den mol Restis sueche.. s türschte si jo eh meischtens d getränk und wenn du en Saal mietisch und es Buffet hesch und denn viellicht no 2 bekannti astellsch wo servierä und d Getränk selber chaufsch chunnts halt billiger as Gsamtpaket vom Catering.

Aber mängmol chunnt di halt s resti doch günstiger will, en saal miete und dä herrichte isch nid billig! Mir hei au en Saal gmietet und werde es Cathering mit Gsamtpaket ha, das chunnt zwar bitz günstiger aber drfür chunnt dr rest alles türer, do ig mir aber mi HZ halt so vorstell isch das es eus au wert.

• Zitieren

nicht registriert

Hey slash!
Also mir hän dr caterer vo parterre ka (dr hauptsitz isch bim
Rest. Rialto) mir sind zu 100% z friede gsi. Mir hän e mediterans bufett ka 3 gänger pro person 54.- sind 40 lüt gsi. Hän s fest im kaisersaal gah im theater fauteuil. Sie hän alles brocht wos brucht het... Mir hän 4 servicekraft ka do sind alli bliebe bis s dessert verbi gsi isch (ca 17.30-0.00h) denn sind 2 heim und 2 sind no bliebe bis 3.30h e fläsche rotwyy het 28.- e wisse 22.- kostet. E liter wasser glaub 4.- es isch mega heiss gsi und es sind fast 80 fläsche trunke worde. Ca 55 fläschli bier, wyy weiss ich nüm... D rächnig vom caterer alles zämme isch ca 5300.- sie sind ca 100.- höcher gsi wie sie uf dr offerte agäh hän! Mir hän d hochzytstorte vo dr bäckerei krebs ka und sie hän astandslos alles gschirr zur verfüegig gstellt, au d schnapsgläsli, hän d schnäps sälber kauft.
Mir sind 1x go probeässe (hän nüd zahlt) 1x zuesätzlich go wyy degustiere do mir bim erste mol unsicher gsi sind (hän nüd zahlt) alli hän s ässe super gfunde, würd sofort wieder die näh. Muesch mol uf d homepage, dört hän sie menuvorschläg (tellerservice) und au buffetvorschläg. Aber du kasch es denn sälber mit dr chefin zämestelle was euch passt...
Ich möcht nur no sage: mir hän dr apero im schützenmattpark ka im pavillion, super apero, tolle wyy (het aber s dopplete kostet wie vom caterer) und hän für ca 180 lüt glich vill zahlt wie für s ässe am fest! Bereu ich aber au nid, do dört au alles gstumme het für uns. D getränk sind zwar türrer gsi, drfür hesch keini personalköste ka! E caterer isch dorum nid immer billig wenn de no d gschirrmieti und d personalköste muesch zahle...
Welli caterer hesch denn scho agfrogt? Mir hän no koche an dr stross agfrogt, dä het uns e offerte vo 40 lüt vo 7000.- gmacht! Vill z vill, es isch vom ässe nid exklusiver gsi wie parterre...

Ich hoff ich ha dir chli könne hälfe..

Lg, dia

• Zitieren

Hallo zämme,

Sorry - ich bi die letste Wuche nid oft im Forum unterwegs gsy, aber schön postet ihr flissig zum Thema, das hilft natürlich enorm :)

Unsere Favorit z.Z. isch s'Kolumbus-Catering vom Stoffero, ich glaub öbber us em Forum het dä au scho gha, d'Priise sind echt unschlagbar, mr treffe is jetzt moll mit em Inhaber zwecks ere detaillierte Offerte.

Süscht hani folgendi Caterer scho agfrogt:
- Migros (macht au e guete Ydruck)
- Siebepfund
- Eventcatering (passe mr irgendwie nid)
- Parterre (au nid schlecht)
- Le Paradis

Aber de Fav isch nach wie vor de Kolumbus ;)

:Schmetterling84 uff d'HP vo dir gangi au moll no go schneuge :)

Hmpf.. es isch so viel.. aber ich will jo nid meckere, es macht jo au Spass :D

• Zitieren