Hi ihr lieben Bräute

Ich bin im Moment gad echli gfrusted. Mir hürated erst im 2010, aber ich bin trotzdem jetzt scho chli am vorbereite. Also eifach so chli die Eckpfiler wiä Location, Kapelle, Apéro etc. Ich han ez scho mega Vorfreud uf de Tag. Aber leider chan die niemert recht mit mir teile.

Min Papi findet die ganz Planig vo de Hochziit viel z übertriebe, min Schatz chan sich nonig recht freue, wells für ihn no viel z wiit weg isch, min best Fründin, wo au Trauzügin isch, zeigt irgendwie au nöd würki Freud und frögt au nöd würki viel dena. Nur wenn ich gad öppis verzelle.
Ach, es isch soooo frustrierend Ich wett doch die Freud au chli chöne mit öpertem teile. Gaht eu au chli eso? Oder hend ihr die gliche Erfahrige gmacht?

Liebs Grüessli
Schusseli






Am 05.06.2010 wird euse Troim wahr

• Zitieren

Tja.... Mir isch es am afang genau glich gange... Hürote au im 2010 und ha scho leschte Herbst gseid, dass me mind. me wiä 1 Johr vorhher Rest. reserviere mues. Sicher ka me glück ha. Aber da risiko wet i den nöd igoh und mi ärgere, wells weg isch und 2schönste neh. Uf jedefall sind mini Mueter und i den im einte go Rest. go Esse und dä Hr. hät denn glichige gseid wiä i und vu döt us isch es denn anderscht gsi... I ha mim Schatz jetzt gseid, das mir jetzt ebe söttid reserviere und da Rest. wo mir gfallt zeiget. Jetzt isch er glich no am selber luege und vergliche... Lot em glob dä stolz nöd zue.

Aber weisch Schusseli für da häsch jo au üs. Aber i kennst, do platzisch fascht mit guete Idee und wetsch din Schatz/Fründeskreis und Familie au nöd überfordere demit. Guet min hät jetzt gester Obig än Fehler gmacht und häd gseid *... und du seisch mir nöd alles*. Tja jetzt wird er denn gnervt

I weiss nöd, diä chönd sich da glob gar nöd vorstelle, aber ä Johr isch so schnell ume. Und i ha jetzt denn no ä Prüefig im Herbst... Säb frist mir denn au no Zit weg. Guet defür hän i denn noch ganz und gar Zit

• Zitieren

Hoi Schusseli
Ja das känni guet! Mir gahts amigs au so. Also erstens dänki, sind da d Männer scho ganz anders, die chönd nöd so lang im vorus scho sich so freue wie mir... und s ander isch, für die persone wo s nöd würkli betrifft ischs halt scho öppis anders, klar freueds sich für dich, aber sie sind halt nöd grad glich euphorisch... erstens ischs au für sie no wiit weg, und grad für d trauzügin isch au sicher no e unsicherheit dehinter will sie so öppis höchtswahrschinli no nie gmacht hät und weiss dass doch no ziemli arbeit uf sie zuechunt.. und es isch ja nöd ihres eigete hochziit! also ich wür mer jetzt mal nöd z viel gedanke mache im moment! wenns dänn aber so es halbs jahr vorher isch dänki gseht die ganz sach wieder anderst us, muesch nume luege!

• Zitieren

Hey Ladies

Merci vielmal für eui Ufmunterig. Han gester gad chli es Tüüf gha. Es tuet eifach guet z ghöre, dass mer da amigs nöd ellei mit so Problem da staht.
Ich glaub, ich mun ez das Thema für mich eifach au mal chli uf d Siite tue. S Wichtigste isch ja scho gmacht. Und de Rest nimmi denn erst spöter in Agriff. Han ja no gnueg Ziit

@maju: das erwart ich scho nöd. Aber echli Freud zeige chamer ja glich. Ich als Trauzügin het au mega Freud und wür viel scho fröge, au wenns no meh wiä es Jahr gaht bis zur Hochziit. Aber ebe, da isch halt jede anderst.

Schöni Ostere a alli!
Grüessli




Am 05.06.2010 wird euse Troim wahr

• Zitieren

Und wäg dim zuekönftige Maa: Mine fühlt sech ame glii öberforderet, weni so met Idee chome. Er meint de ame, es möig de scho so si wienis ez afe als Idee meine. Drom han ech ehm müesse klar mache, dases nor Idee send ond no nüd fix ond ez heder kes Problem me demet!

Im Juli 2010 ist es soweit!

• Zitieren